Paraditen e sotme nga ora 10:00-14:00 do të zhvillohen homazhet në nderim të Moikom Zeqos, në Muzeun Historik Kombëtar.
Familjarët e tij kanë treguar se kjo ishte dëshira e tij e fundit, për t’ju dhënë lamtumira në një institucion që e drejtoi për 8 vite radhazi, 1997-2005.
Moikom Zeqo u nda nga jeta 5 ditë me parë pas një beteje të gjatë me një sëmundje të rëndë. Edhe pse nuk jeton më kontributi i tij mbetet i paçmuar në letërsi, politikë, publicistikë, filozofi, arkeologji edhe pikturë.
Zeqo cilësohet nga miqtë dhe kolegët, si një ndër intelektualët e paktë që ia kushtoi jetën krijimtarisë, familjes, por mbi të gjitha emancipimit të politikës edhe shoqërisë shqiptare.
