Kur Mbretëresha britanike Elizabeta II kremtoi Përvjetorin e saj të Safirit në fron më 6 shkurt 2017, ajo u bë monarkia e parë britanike që e arriti atë numër,pra 65 vjet nga kurorëzimi i saj. Në moshën 94-vjeçe, ajo vazhdon të kryejë angazhimet e saj mbretërore, duke pasur lidhje me më shumë se 600 organizata, përfshirë organizata bamirësie, të shërbimeve publike apo grupime profesionale.
Por si një nga figurat më të dukshme dhe simbolike të botës, gjatë gati 7 dekadave të sundimit të saj, Mbretëresha ka rënë pre e disa atentateve apo kërcënimeve. Ja cilat janë disa nga ngjarjet më të bujshme:
U sabotuan shinat për të rrëzuar trenin e Mbretëreshës gjatë vizitës së saj në Australi në vitin 1970
Më 29 Prill 1970, Mbretëresha dhe burri i saj Princi Filip po udhëtonin me tren nga Sidnei drejt Uellsit të Ri Jugor, kur treni u përplas me një trung peme të vendosur enkas mbi shina. Për fatin e çiftit mbretëror, makinisti Albert Roulej e vuri re në kohë objektin, duke tërhequr frenat në kohën e duhur.
Edhe pse shinat ishin kontrolluar vetëm një orë para incidentit, mendohet se trungu ishte vendosur atje me qëllim kur të kalonte treni mbretëror. Sikur treni të vazhdonte të ecte me shpejtësi të plotë, ai mund të dilte nga shinat dhe të ishte përplasur me argjinaturën anash, thanë ekspertët për “The Telegraph”.
Ky lajm nuk u bë publik deri në vitin 2009, kur një detektiv në pension foli për incidentin, duke thyer heshtjen e gjatë mbi të cilin ishte rënë dakord nga policia dhe shtypi. Ndërsa çifti mbretëror thuhet se nuk u vu në dijeni të incidentit, Roulej iu dha Medalja e Shërbimit Perandorak në vitin 1974.
Një adoleshent britanik qëlloi në drejtim të Mbretëreshës Elizabeta, gjatë një parade në vitin 1981
“Trooping Colour”, është një nga ngjarjet më festive vjetore të britanikëve, ku me mijëra ushtarë muzikantë dhe kuaj marshojnë çdo qershor në rrugët e Londrës. Por në ceremoninë e 13 qershorit 1981, 17-vjeçari Markus Sarxhent qëlloi 6 herë në drejtim të Mbretëreshës Elizabeta, por pa qëlluar në shenjë.
E hipur mbi një kalë, monarkia qëndroi shumë e qetë ndërsa policia e përplasi përtokë qitësin duke e arrestuar. Sarxhent që kishte shfaqur interes për atentatet ndaj Xhon Kenedit dhe Xhon Lenonit, u burgos për 5 vjet sipas Aktit të Tradhtisë së vitit 1842, që nuk ishte përdorur që nga viti 1966. Ai u lirua në tetorin e vitit 1984.
Vetëm disa muaj më vonë, një tjetër 17-vjeçar qëlloi mbi Mbretëreshën në Zelandën e Re
Katër muaj më vonë, më 14 tetor 1981, Mbretëresha Elizabeta po vizitonte Zelandën e Re me Princin Filip, kur një tjetër 17-vjeçar pati të njëjtën ide të tmerrshme. Duke u fshehur në katin e pestë të një godine në Dandin, Xhon Lius qëlloi me një pushkë sapo çifti mbretëror doli nga makina e tyre Rolls-Royce.
Sërish për fatin e mirë të Mbretëreshës, Luis nuk qëlloi në shenjë. E shqetësuar se mos monarkët nuk do të ktheheshin më kurrë në Zelandën e Re, policia vendase e shpjegoi zhurmën që u dëgjua si shpërthim fishekzjarresh.
Një burrë hyri 2 herë brenda muajit në dhomën e gjumit të Mbretëreshës në vitin 1982
Arsyet se pse Majkëll Fagan u end në Pallatin Bakingam më 9 korrik 1982, janë ende të paqarta, madje edhe për veten e tij. Ai thuhet se përdori ullukët për t’u ngjitur deri në dhomën e gjumit të Mbretëreshës.
“Fagan hyri në dhomën e gjumit të Madhërisë së saj rreth orës 7:15 të mëngjesit duke mbajtur në dorë një copë tavëll të thyer, me të cilën kishte thënë se kishte ndërmend të priste damarët në praninë e Madhërisë së saj”- raportoi Times. Disa minuta më vonë, ai tërhoqi perden dhe e gjeti Mbretëreshën teksa flinte vetëm. Ajo e bllokoi me sukses, dhe thirri për ndihmë. Rojet e sigurisë e arrestuan menjëherë Fagan.
Burimi i lajmit: https://www.biography.com/news/queen-elizabeth-ii-assassination-attempts
Përshtatur nga TIRANA TODAY
