Sot është një ditë pushimi për punonjësit e administratës. Ky lajm u njoftua më herët nga kreu i qeverisë Edi Rama, i cili shtoi se do të bëhet edhe një tjetër mbledhje qeverie që ta bëjnë ditën e hënë pa makina, për të kursyer e jo për ekologji. Po kështu, qeveria shqiptare do të nisë zbatimin e planit të kursimit të energjisë. Ministrja Belinda Balluku tha se masa e parë është ndërprerja e ndriçimit në disa akse kombëtare pas mesnatës.
“Aksi Tiranë-Durrës, bypassi i Durrësit, Plepa-Kavajë-Rrogozhinë, Qafë Kashari-Rinas, Lin-Pogradec, bypassi Shkodër, Korçë-Ersekë, Ura e Gajdarit-Qafë Gjashtë. Ndërkohë do të ketë ndërprerje dhe në akset kombëtare të ndriçuara në degëzim siç janë: bypassi i Fierit me hyrje daljet e tij, Lezhë-Shëngjin me degëzime dhe Shkodër-Hani i Hotit në degëzimet e tij”.
Nuk do të ndërpritet ndriçimi në kryqëzime, për të mos rrezikuar jetët e qytetarëve siç janë rrethrrotullimet në akset Rrogozhinë – Lushnjë, Shkodër – Hani i Hotit dhe Lezhë – Kakariq.
Qeveria i ka kërkuar edhe pushtetit lokal që të ndërprersë ndriçimin e fasadave të institucioneve publike apo akseve rrugore të panevojshme. Balluku thotë se qeveria është e vendosur të mbrojë konsumatorët familjarë, dhe biznesin e vogël.
“Qeveria ka vendosur që të mbrojë familjet dhe bizneset e vogla. Nuk do të këtë rritje çmimesh, por duhet të kuptojmë se duhet të kursejmë”.
