Ambasadori i Bashkimit Europian në Shqipëri, Luigi Soreca i bën thirrje klasës politike shqiptare, që të respektojnë marrëveshjen e 5 qershorit.
Soreca shprehet se çdo propozim për ndryshim i mëtejshëm duhet të diskutohet në Këshillit Politik e më pas të miratohet në parlament.
”Ne përsërisim qëndrimin tonë që marrëveshja e 5 qershorit, e cila ka zbatuar rekomandimet e OSBE/ODHIR mbi reformën zgjedhore, duhet të respektohet. Ne gjithashtu konfirmojmë rëndësinë që çdo propozim për ndryshime të mëtejshme në nenet e kodit zgjedhor shqiptar, për të cilat tejkalojnë qëllimin e marrëveshjes së 5 qershorit, të diskutohet si duhet në kuadrin e Këshillit Politik në mënyrë bashkëpunuese dhe gjithëpërfshirëse përpara se të votohet në Parlament’’, shkruan Soreca në Twitter.
Më herët, edhe ambasadorja e SHBA-ve në vendin tonë, Yuri Kim, u bëri apel krerëve politikë që të zbatojnë marrëveshjen e 5 qershorit.
Sipas saj, ata që nënshkruan atë marrëveshje, janë përgjegjës për zbatimin e saj.
