Një sondazh i publikuar sot në Francë, tregon se vetëm 1/3 e popullit ka besim te aftësitë e presidentit Macron, për të trajtuar problemet e vendit.
Sipas sondazhit të realizuar nga gazetat “Les Echos” dhe “Radio Classique”, masa e mbështetjes për Macron ishte vetëm 34%, pesë pikë më pak se muajin e shkuar.
Sondazhi dy ditor u krye më datë 4 dhe 5 maj, ndërsa morën pjesë 1,009 persona. 61 përqind e pjesëmarrësve u shprehën se nuk kishin besim në aftësitë e Macron, për të zgjidhur problemet e vendit.
Rezultatet e këtij sondazhi ishin në të njëjtën linjë, me ato të anketës së një dite më parë nga grupi Harris Interactive-Epoka. Kjo e fundit tregoi se mbështetja për Macron kishte rënë me tetë pikë përqindjeje brenda një muaji.
Kryeminsitri Edouard Philippe ka konfirmuar se 11 maji do të shënojë ditën e nisjes së rikthimit “progresiv” drejt normalitetit, pas gati dy muajsh kufizimesh të ashpra.
Ai tha se ishte bërë progres i mjaftueshëm kundër sëmundjes, por paralajmëroi se nëse virusi përshpejtohet përsëri, masat do të rivendosen.
Franca renditet e gjashta në botë për numrin më të madh të rasteve me koronavirus. Deri më tani vendi numëron mbi 174 mijë raste infektimi dhe 26,230 viktima.
