Siguria kombëtare tashmë është çështje dite, pas grabitjes së miliona eurove brenda perimetrit të sigurisë në aeroportin e Rinasit. Admir Murataj u qëllua me plumb në kokë nga policia, ndërsa grabitësit e tjerë ia hodhën paq duke u larguar me thasët me para.
Policia vijon punën për kapjen e tyre, ndërsa duhet thënë se informacionet janë tejet të rezervuara, teksa ende nuk kemi një deklaratë zyrtare lidhur me numrin e grabitësve (4 apo 5), dhe as lidhur me shifrën e saktë të grabitur (përflitet se është 10 milion euro).
Menjëherë pas ngjarjes pati reagime të shumta, ndërsa një nga çështjet më të diskutuara është se e kujt është përgjegjësia për grabitjen që ndodhi ditën për diell, rreth orës 15:00.
Replikat politike kanë qenë të shumta, teksa ministrat Lleshaj, Xhaçka dhe Balluku ia kanë hedhur fajin konçesionarit, ndërsa kompania kineze është përgjigjur me një deklaratë, ku citohet se “aeroporti është i të gjithë shqiptarëve dhe i takon Policisë që ta mbrojë e ta sigurojë atë”.
Mendimet janë të ndryshme lidhur me palën që i takon përgjegjësia, por faji mbetet gjithnjë jetim. Ajo që shqetëson më së shumti shqiptarët, është rendi dhe siguria e tyre.
Edhe në këtë aspekt, opinioni publik ndahet sërish në pjesë, disa e konsiderojnë ngjarjen një “rënie të sigurisë kombëtare”, e të tjerë kanë një këndvështrim më të ftohtë, duke e cilësuar atë një “cenim të sigurisë kombëtare”.
Edhe palët politike mbrojnë këndvështrime të caktuara, por çfarë mendojnë vetë qytetarët lidhur me këtë?
Tirana Today pyet me anë të një sondazhi, nëse ka rënë siguria kombëtare, referuar grabitjes spektakolare në Rinas.
Klikoni linkun e mëposhtëm për të marrë pjesë në sondazh:
SONDAZH * Super-grabitja në aeroport, a ka rënë siguria kombëtare?
