Një rrugë në njësinë numër dy të Tiranës, do të marrë emrin e ish-deputetit të Partisë Demokratike Sokol Olldashi.
Vendimin e ka bërë të ditur kryetari i Bashkisë së Tiranës, Erion Veliaj pas mbledhjes së Këshillit Bashkiak, teksa u shpreh se ka dërguar propozimin për emërtimin e kësaj rruge.
“Po propozojmë, me shpresën që të miratohen unanimisht, për emërtimin e një rruge me emrin “Sokol Olldashi”, një rrugë në njësinë numër 2, kjo vjen pas emërtimit të një shkolle me emrin ‘Bashkim Fino’ po në njësinë numër dy. Me emërtimin e rrugës ‘Sokol Olldashi’ është edhe një lloj balancimi, duke bërë një emërtim me emrin e ish-funksionarit dhe aktivistit të PD.”– tha Veliaj.
Më herët në Shënkoll, rruga që të çon për në plazhin e Lezhës, mori emrin e Olldashit,i cili u nderua dhe me titullin “Nderi i Komunës”, dy muaj pas vdekjes së tij.
Ish-deputeti i PD-së, Sokol Olldashi humbi jetën në një aksident të rëndë automobilistik më 20 nëntor të vitit 2013.
