Seanca e stërvitjes së skuadrës së Skënderbeut është zhvilluar në qetësi të plotë. Ilir Daja ka urdhëruar mbylljen e dyerve të stadiumit. Dje në orën 18:00, të gjithë futbollistët dhe stafi teknik janë paraqitur në ambientet e stadiumit, teksa shkallët e stadiumit kanë qenë bosh.
Për tu kujdesur që tifozët nuk do tentonin të hynin në stadium, në pistë kanë qenë prezentë edhe uniformat blu.
Daja ka praktikuar disa skema loje dhe për t’ju ruajtur ndonjë “spiuni” të mundshëm që mund të ishte prezent në këtë seancë ka kërkuar të punojë në qetësi. Megjithatë, ka pasur pakënaqësi nga tifozët, që u detyruan ta shikonin stërvitjen nga kangjellat e stadiumit.
Ndërkohë që mbrojtësi i Skënderbeut, Bajram Jashanica nesër ka për të qenë në fushë. Të martën ai ka zhvilluar të plotë seancën stërvitore, duke qetësuar trajnerin Ilir Daja. Pas dëmtimit në kavilje, të pësuar në pjesën e parë të takimit ndaj Mladës në Çeki, stafi teknik mendoi se bëhej fjalë për diçka serioze.
Dje në fillim të seancës, Jashanica është konsultuar me mjekun dhe trajnerin Daja, duke pranuar të jetë prezent në dy seancat e fundit. Ajo që është më e rëndësishme, mbrojtësi do të jetë në fushë nga minuta e parë kundër Mladës. Ky është një lajm i mirë për Dajën.
Ai do të rikthehet në qendër të mbrojtjes, duke formuar dyshen me Marko Radasin, ndërsa Vangjeli dhe Mici do të jenë në krahët e repatit difensiv. Prapavija do të kompletohet me Shehin në mes të shtyllave. Në mesin e fushës si digë është Osmani, ndërsa para tij Lilaj i rikthyer nga pezullimi dhe Nimaga do të jenë gjithashtu në qendër të mesfushës.
Në krah të majtë Latifi është i sigurt, ndërsa në të djathtë Gavazaj do ta nisë nga minuta e parë. Me këtë lëvizje, dukshëm Daja kërkon më shumë forcë sulmuese për të shënuar golin e kualifikimit.
E vetmja dilemë është maja e sulmit. Xhejms tashmë është rikuperuar plotësisht, ndërsa Plaku gjatë gjithë javës është provuar si titullar. Dje Daja ka mbajtur pjesën më të madhe Xhejmsin në anën e titullarëve.
Vendimi do të jepet sot, kur skuadra do të kryejë seancën përmbyllëse në “Elbasan Arena”.
