Acari që ka mbuluar Shqipërinë nuk e ka ndaluar futbollin shqiptar që të zhvillojë javën e 22 të Superiores. Kulmi arriti në ‘Zeqir Ymeri”, ku dëbora ishte intensive dhe fusha nga jeshile u kthye në të bardhë.
Kampionët në fuqi pritën kryesuesit e Superiores në misionin për ti mposhtur dhe të prekin vendin e dytë, por që nuk patën sukses pasi ndeshja u mbyll në barazimin 2-2. Pjesa e parë foli e gjitha për vendasit të cilët edhe pse në një terren të vështirë arritën të kishin kontroll më të mirë të lojës dhe të gjenin dy herë rrugën e rrjetës.
Zhbllokimi i shifrave në minutën e 20-të, praktikisht herët, u ka dhënë zemër vendësve, të cilët kanë qenë më dominues në lojë ndaj korçarëve. Këta të fundit janë munduar me goditje nga distanca, por janë ndëshkuar për herë të dytë, në minutën e fundit të së parës, duke pësuar një tronditje të konsiderueshme psikologjike.
Pjesa e dytë ishte e kundërta e së parës, edhe pse fusha ishte tërësisht e mbuluar nga dëbora, miqtë arritën të dilnin në lojën e tyre. Në minutën e 61 është Soue që i ikën mjaft mirë mbrojtjes së verilindorëve dhe me një goditje nga jashtë zone shkurton diferencën.
Vetëm 8’ minuta më vonë është sërish Soue që bëhet protagonist me golin e dytë të Skënderbeut dhe të dytin personal. Ai përfiton mjaft mirë nga një lëmsh i vërtetë i krijuar në zonën e Kukësit dhe dërgon topi në rrjetë.
Përpjekjet për golin e fitores janë të dyanshme, goditet edhe një shtyllë nga Guri, deri në vërshëllimën e fundit të kryesorit Kola, por asgjë nuk ndryshon. Katër gola në dëborë, që vulosin barazimin 2-2 dhe dërgojnë nga një pikë në llogarinë e dy skuadrave. Kuptohet, rezultat i mirë për Skënderbeun, që nuk lëshon pe në krye, ndërsa Kukësi ndien se ka lënë dy pikë, duke parë avantazhin e pjesës së parë dhe faktin që luante në shtëpi.
