Skënderbeu ka marrë një tjetër fitore mjaft të rëndësishme pas asaj me Kukësin, pasi ka mposhtur Luftëtarin në Gjirokastër me rezultatin 2-0. Ka qenë Hodha dhe Dita autorët e golave që kanë bërë që ekipi i drejtuar nga Orges Shehi të marrë kryesimin e kampionatit përkohësisht. Pasi Partizani qëndron vetëm një pikë pas tyre dhe do të përballet të hënën me Kukësin.
Vendasit e nisin mjaft mirë ndeshjen dhe mbajnë nën presion korçarët, por duke kaluar minuta gjithçka baraspeshohet dhe rastet për të shënuar janë të shumta. Ndërsa në pjesën e p[arë heronjtë e takimit ishin portierët, Ruci dhe Teqja. Rezultati u zhbllokua në minutën e 68’, ku ishte Hoxha ai që dërgon topin në rrjetë vetëm 2’ minuta pasi ishte aktivizuar. Luftëtari hidhet në sulm dhe lë shumë hapësira mbrapa, të cilat i shfrytëzon mjaft mirë Bruno Dita në minutën e 81’ ku dyfishon rezultatin.
Ndërsa në sfidën tjetër mes Kamzës dhe Flamurtarit ka pasur një ‘luftë’ të ashpër për një pikë. Takimi ka përfunduar në barazim 2-2 dhe ka dhuruar spektakël në fushën e blertë. Ndeshja nis mjaft mirë për vendasit të cilët gjejnë golin shumë shpejt me kapitenin, Sebino Plaku.
Kundërpërgjigja e bregdetarëve erdhi në minutën e 23’ me Busic, ishte Batha që depërtoi mjaft mirë në zonë dhe pasoi për sulmuesin i cili nuk fal në atë pozicion. Në mbrojtje Kamza kishte shumë probleme dhe një goditje këndi krijoi panik në zonë, me Mustën që më një goditje të fortë shënoi golin e dytë vlonjat. Goli tronditi Kamzën, që në vazhdim sulmonte pa qartësi dhe ia bëri të lehtë punën mbrojtjes vlonjate, edhe pse rreziqet nuk munguan dhe me pak kujdes Plaku me shokë mund të shënonin.
Kapiteni i Kamzës ishte luftëtari i fundit që u dorëzua, sepse 10 minuta para fundit me një predhë nga distanca futi në krizë Koliçin, i cili grushtoi me vështirësi. Pikërisht kur dukej se Kamza po dorëzohej, erdhi dhe goli i barazimit. Një kundërsulm i shpejtë, Roloviç i vetëm afër vijës fatale nuk mund të gabonte, 3 minuta para fundit. Me entuziazmin e golit, Kamza u hodh e gjitha përpara, por gol nuk pati më, edhe pse në shtesë Plaku me kokë mendoi se shënoi, por Koliçi ishte perfekt. Barazim 2-2 dhe shumë keqardhje, në të dy krahët, për gabimet e shumta mbrojtëse.
