Një fundjavë e nxehtë e pret kampionatin shqiptar, pasi të shtunën në orën 19:00 do të zhvillohet supersfida Skënderbeu-Partizani. Në kampin korçar vazhdon stërvitja me impenjim maksimal të lojtarëve pasi kërkojnë vetëm fitoren dhe të kryesojnë tabelën. Në një prononcim për mediat lojtarët e Skënderbeut janë shprehur :
Ali Soue: “Të luash me Skënderbeun fitorja gjithmonë është një detyrim. Është ekipi më i mirë në Shqipëri dhe për këtë fitorja duhet gjithnjë pasi objektivi i klubit është të jesh në vendin e parë dhe të fitosh titullin. Për këtë arsye nuk bëjmë kompromis me asnjë ekip dhe nuk hyjmë në fushë për rezultat tjetër. Me punën e grupit shumë shpejt do të vijë edhe goli”
Gjergji Muzaka: “Unë jam gjithmonë i njëjti dhe mundohem që të jap më të mirën time me çdo ekip ku bëj pjesë. Ata që kanë pasur dyshime tek aftësitë e mia tashmë e kanë marrë përgjigjen nga paraqitjet time në fushë. Jam në një ekip të madh dhe bëj maksimumin për të treguar më të mirën e mundshme sa herë më jepet mundësia. Ndaj Partizanit japim gjithçka për të marrë 3 pikë”
Donjet Shkodra: “Goli më lehtësoi disi por për fat të keq nuk solli tri pikët. Ndaj Partizanit do të jetë një tjetër histori. Jemi më të freskët dhe më të përqendruar. Do të bëjmë maksimumin që ta fitojmë këtë takim edhe për tifozët që e presin këtë fitore. Ekipi është mirë dhe kjo të jep besim se gjithçka do të shkojë mirë edhe në këtë takim”
Skënderbeu vjen nga një ndeshje jo e mirë e javës së fundit pasi arriti të merrte vetëm një pikë përballë Kamzës. Por trajneri Daja ka pasur më shumë kohë në dispozicion për të përgatitur ekipin për këtë derbi si ç’mund ta quajmë tashmë. Statistikat flasin kundër teknikut, pasi për aq kohë sa drejtonte ekipin e Tiranës nuk arriti ta mposhtë Partizanin. Po ashtu edhe pasi mori në drejtim korçarët vetëm një barazim 2-2 arriti të merrte në ndeshjen e fundit të kampionatit.
Tirana Today
