Ekipi i Kamzës ishte përgatitur për një rezultat pozitiv në ndeshjen ndaj Skënderbeut, por nuk ia ka dalë dot. Skuadra korçare ka përmbysur rezultatin në transfertë. Kamza shpresonte për një rezultat pozitiv brenda në shtëpi, por ndeshja përfundoi me avantazhin e miqve me rezultatin 1-2.
Ekipi juglindor është tronditur pas akuzave të hedhura nga UEFA për trukime ndeshjesh, por kjo duket se nuk ka ndalur vrullin e “ujqërve të dëborës”.
Nëse akuzat e trukimeve do të vërtetohen, Skënderbeu rrezikon përjashtimin për 10 vite nga kompeticionet evropiane të futbollit. Vendasit e nisën mirë ndeshjen, ndërsa shënuan që në minutën e 10-të me anë të Filit. Korçarët u përpoqën të gjejnë golin, por pjesa e parë përfundon në avantazh të vendasve.
Në të dytën, në 55’, Emiljano Vila barazon për Skënderbeun. Pas 14 minuta, sërish Vila shënon, duke përmbysur gjithçka. Skënderbeu mbron me fanatizëm avantazhin. Pas kësaj fitoreje, ekipi korçar shkëputet i vetëm në krye të klasifikimit me 46 pikë i ndjekur Flamurtari i vendit të dytë me 32 pikë.
