Pavarësisht ndryshimeve të shumta që ka bërë në ekip, Skënderbeu bëhet “i madh” me të mëdhatë. Korçarët kanë mposhtur në shtëpi Kukësin me rezultatin e ngushtë 1-0, duke festuar më së miri rikthimin e tifozëve në stadium. Skuadra e drejtuar nga Orges Shehi triumfoi ndaj të rikthyerit Armando Cungu tek verilindorët falë golit të Gripshit në minutën e 16’ të takimit.
Korçarët zhvilluan një takim mjaft të mirë, veçanërisht në pjesën e parë ku Otto John goditi traversën e portës së kuksianëve, ndërsa Muzaka humbi një penallti të akorduar me shumë zemërgjerësi nga arbitri kryesor.
Nga ana tjetër, kuksianët e Armando Cungut bënë shumë pak për të shmangur humbjen, teksa u zgjuan vetëm në 15 minutat e fundit dhe arritën t’i afrohen zonës së Skënderbeut, por pa vënë seriozisht në provë portierin Teqja.
Me këtë rezultat Skënderbeu kalon Kukësin e Laçin dhe shkon në vendin e dytë, në kuotën e 14 pikëve, dy më pak se Partizani që kryeson i vetëm me 16 pikë, pas vetëm 7 javëve të para të kampionatit.
