Nga qyteti i Korçës, kryeministri Rama ka premtuar ndërtimin e ri të stadiumit të Skënderbeut. Kreu i qeverisë është shprehur se pas ndërtimit të stadiumit të Kukësit, do të nisë puna dhe për atë të Korçës. Duke qëndruar në të njëjtën linjë, Rama i mëshoi faktit se investimi do jetë serioz, për të bërë një stadium model të standardeve.
“Do fillojmë ndërtimin e stadiumit të Kukësit. Pas Tiranës, Shkodrës dhe Elbasanit, do kemi edhe Kukësin me stadium. Meqenëse keni Elisën deputete, ka shanse që pas Kukësit të bëhet stadiumi edhe në Korçë.
Kemi një plan për rindërtimin e stadiumit. Korça e meriton dhe nuk mundet dot që në gjithë këtë modernizim, ne të lëmë akoma për një kohë të gjatë stadiumin në atë gjendje që është, që është qesharak.
Do investohemi seriozisht për të bërë një stadium model të standardeve, apo dhe modelit që është vendosur këtu, për çdo ndërtim të ri që bëhet në Korçë”, përfundoi Rama.
Vlen të theksohet fakti se skuadra e Skënderbeut ka një dënim 10 vjeçar nga UEFA, për të mos luajtur më në Kupat e Europës, për shkak të trukimeve të shumta që ka kryer.
