Komisioni i Disiplinës pran FSHF-së ka marrë vendimet pasi është mbyllur java e parë e kampionatit shqiptarë. Një sezon që nuk filloi aspak mirë, por me një përleshje masive në Korçë, por edhe me shkatërrimin e stadiumit të Skënderbeut. Atje luhej përballja me Partizanin, një ndër më të rëndësishmet në sezonin e fundit por që pati një fund të hidhur. Për këto trazira janë ndëshkuar të dy ekipet, ku organizatorët e Skënderbeut kanë një dënim më të rëndë.
Në Korçë u eksperimentua për herë të parë largimi i policisë nga stadiumi dhe zëvendësimi i tyre me polici private, por rezultoi të ishte një dështim i madh. Disiplina ka paralajmëruar edhe klubin e Tiranës për sjellje të gabuar të tifozëve, kujtojmë që këta të fundit hapën një banderolë gjatë ndeshjes ku shkruhej “Mbro Teatrin” dhe që u largua menjëherë nga policia.
1.Zyrtari i KF “Laçi”, Pashk Laska për protesta ndaj vendimeve të zyrtarëve të ndeshjes kundër KF “Skënderbeu” e vlefshme për Superkupën e Shqipërisë, në bazë të nenit 56/1/a) të KDS, dënohet me 2 (dy) ndeshje pezullim nga aktivitetet. Në bazë të nenit 20, zyrtarit i ndalohet hyrja dhe qëndrimi në dhomat e zhveshjes, territorit përreth fushës së lojës dhe stolit të rezervave.
2.KF “Tirana”, paralajmërohet se në rast përsëritje të sjelljes së gabuar të spektatorëve do të jetë subjekt i masave ndëshkimore që përmban Kodi i Disiplines Sportive.
3.FK “Kukësi”, paralajmërohet se në rast përsëritje të reagimeve paragjykuese ndaj zyrtarëve të ndeshjes, do të jetë subjekt i masave ndëshkimore që përmban Kodi i Disiplines Sportive.
4.KF “Skënderbeu”, për sjellje të gabuar të spektatorëve duke përdorur mjete ndezëse, hedhur gurë brenda rrethimit të fushës duke shkaktuar akte dhune dhe ndërprerje të përkohshme të ndeshjes kundër FK “Partizani”, në bazë të nenit 66/1 dhe 66/3/b) të KDS dënohet me gjobë në masën 300.000 (treqindmijë) lek dhe zhvillimin e 5 (pesë) ndeshjeve pa spektatorë në stadiumin përkatës.
5.FK “Partizani”, për sjellje të gabuar të spektatorëve duke përdorur mjete ndezëse, hedhur gurë brenda rrethimit të fushës duke shkaktuar akte dhune dhe ndërprerje të përkohshme të ndeshjes kundër KF “Skënderbeu”, në bazë të nenit 66/1 dhe 66/3/b) të KDS dënohet me gjobë në masën 200.000 (dyqindmijë) lek dhe zhvillimin e 4 (katër) ndeshjeve pa spektatorë.
6.Mos shqyrtimin e kërkesës së lojtarit të KF “Vora”, Artur Sejdini, duke mos qënë kjo kërkes në kompetencë të Komisionit të Disiplines Sportive.
