Skënderbeu ka mposhtur Flamurtarin në javën e katër të kampionatit me rezultatin e pastër 0-2. Në një stadium të mbushur si kurrë më parë, korçarët i japin një leksion të mirë ish-trajnerit të tyre, Ilir Dajës. Skënderbeu e ka dominuar takimin nga minuta e parë deri në të fundit, duke mos i lënë në asnjë moment vendasit të shfaqen të rrezikshëm. Orges Shehi ose nxënësi, ka fituar betejën e për me “mësuesin”, Ilir Dajën.
Ndeshja fillon me shumë agresivitet dhe mesfusha u kthye në një arenë të vërtetë, ku u shkaktuan shumë faulle. Rasti i parë i rrezikshëm erdhi pas minutës së 10’, ku ishin vendasit që u shfaqën në dy raste rrezikshëm, por pa arritur të shënjestrojnë portën e mbrojtur nga Teqja.
Skënderbeu fillo të fitojë terren dhe fillon të funksionojë më mirë. Në harkun e pesë minutave, Dita, Radas dhe Bregu shfaqin rrezik, por këto episode nuk shfrytëzohen si duhen. Momenti i vërtetë është në minutën e 20’, ku Bregu godet mjaft mirë por topi ndalet në shtyllë, pavarësisht se anësori kishte sinjalizuar pozicion jashtë loje. Deri në fundin e pjesës së parë ka shumë aksione, por mungon pasa e fundit tek të dy skuadrat për të zhbllokuar rezultatin. I vetmi rast i rrezikshëm për vendasit do të ishte ai i Busic dy minuta para përfundimit. Sulmuesi gjuan drejt portës, por portieri Teqja pret dhe mban të pa prekur rrjetën.
Pjesa e dytë nis më mirë për vendasit, por nuk arrijnë të rrezikojnë dhe duelet zhvillohen në mesin e fushës, ku shkaktohen faulle të panumërta. Duhet të vinte minuta e 74’ që të zhbllokohej rezultati. Një shpërqendrim në mbrojtjen e vlonjatëve dhe topi i hedhur në zonë nga Radas ulet në zonë nga Valgjeli dhe më pas është Krasniqi që e dërgon në rrjetë. Një gol që hesht stadiumin.
Kur pritej që Flamurtari të reagonte dhe të hidhej në sulm, është sërish Skënderbeu që shfaqet më i rrezikshëm. Në minutën e 86-të, Dejvi Bregu jep një asist për Oto John që del i vetëm përballë Koliçit dhe e dërgon topin në rrjetë. Tashmë s`ka më heshtje në stadium por fishkëllima dhe zbrazje të shkallëve nga tifozët.
