Në 7 shkurt u mbajtën zgjedhjet e Asamblesë Zgjedhore në Federatën Shqiptare të Futbollit, por që ka gjasa se mund të përsëriten. Pavarësisht rizgjedhjes së presidentit Armand Duka për herë të pestë, nga shoqatat që janë denoncuar tashmë në Prokurori, sikur një e vetme të ishte e jashtëligjshme, atëherë Federata Shqiptare e Futbollit duhet të ribëjë zgjedhjet. E njëjta gjë vlen edhe për anëtarët e Komitetit Ekzekutiv.
Report Tv zbulon faktin se, do të mjaftonte qoftë edhe një shoqatë e vetme e paregjistruar dhe me një vendim Gjykate si e jashtëligjshme e pa të drejtë vote, në mënyrë që Asambleja Zgjedhore e Federatës të cilësohej nuk dhe të organizohej një tjetër e Jashtëzakonshme.
5 nga 8 shoqatat që votuan më 7 shkurt, janë regjistruar në Gjykatën e Tiranës nga 19 janari, deri më 2 shkurt, pikërisht në kohën që lista e delegatëve ishte mbyllur dhe nuk mund të bëheshin më ndryshime. Dy shoqatave, përkatësisht asaj rajone të Korçës dhe të Shkodrës, u është kthyer dosja për plotësim dokumentacioni, sepse ka pasur mungesa.
Ndërsa shoqata rajonale e Gjirokastrës nuk është regjistruar dhe ka vendim gjykate, pikërisht me datën 24 janar 2018. Edhe sikur të mos llogariten shoqatat e tjera, do të mjaftonte kjo e fundit që zgjedhjet e FSHF-së të përsëriten.
Fjala tashmë është për Prokurorinë dhe Gjykatën për të dhënë vendimin final në lidhje shoqatat e denoncuara nga klubi i Flamurtarit, me përfaqësues administratorin Sinan Idrizi. Nëse një shoqatë shpallet e paligjshme, hapi i radhës pastaj është shpallja e pavlefshmërisë së Asamblesë Zgjedhore të 7 shkurtit.
