Në skemën e inceneratorëve, figurojnë përfitues emra pranë Lulzim Bashës. Kështu u shpreh kryetarja e LSI-së, Monika Kryemadhi në një takim me gazetarët. Ajo tha se do t’i drejtohet SPAK-ut, ndërsa nuk pranoi që t’i bënte publikë emrat në këtë takim.
“Patjetër që do t’i denoncoj, por nuk kam ndërmend t’i përmend sot me emra. Emra dhe kompani që kanë marrë në shkëmbim të blerjes së votës apo vendimeve politike, disa kanë marrë shuma parash, disa toka, disa vila, disa biznese, të cilat janë të faktuara. Mjafton të gjëmosh paranë, do shikosh që përfundon te emri i gruas që blen një vilë e me radhë.
Normal që janë të denoncuara, por ka dhe nga ata të cilët pavarësisht se mund të jetë një faturë e fryrë, ka nga ata që te këto vaskat mund të ketë hedhur beton, dhe kjo faturë nga x lekë që ka kushtuar betoni, s’mund ta bësh 100 x.
Janë prova që ne do t’ia dorëzojmë të gjitha këto SPAK-ut. Thash kjo është njëra nga kompanitë e njërës kompani, këto janë fatura që ne i kemi mbledhur në një tabele, se po t’i mbledhësh të gjitha faturat, bëhen 1400 fatura vetëm për një kompani”, tha ajo.
Kryetarja e Lëvizjes Socialiste për Integrim, Monika Kryemadhi gjatë konferencës me gazetarët komentoi edhe projektin “Open Balkan”, për të cilin tha se është një evazion fiskal, por që do të bëhet në kurriz të shqiptarëve me kompanitë serbe.
“E vetmja mënyrë për të ndaluar atë që po ndodh në Ukrainë, mund të jetë nesër në Shqipëri. Ne e dimë shumë mirë që sjellja e forcave ruse në Beograd rrezikon jo vetëm stabilitetin në rajon, por edhe qëndrueshmërinë e Shqipërisë.
“Open Balkan” është skemë financiare evazion fiskal, por që do bëhet në kurriz të shqiptarëve me kompanitë serbe”, tha Kryemadhi.
