Ish-kryeministri Berisha ka reaguar në lidhje me vjedhjen e pasaportave në Greqi. Më herët, Ministria e Jashtme pranoi se në doganën e Kakavijës janë bllokuar disa pasaporta shqiptare, si edhe faktin se në Greqi janë vjedhur 100 pasaporta të emigrantëve shqiptarë. Përmes një reagimi zyrtar, MEPJ sqaroi se sa i takon bllokimit të pasaportave në Kakavijë, ato po transportoheshin drejt Greqisë, por nuk kanë qenë të ambalazhuara sipas rregullave.
Berisha, mjaft i shqetësuar thotë se pasaportat në fjalë mund të përdoren nga mafia shqiptare dhe rajonale e më gjerë. Në këtë formë kërcënojnë sigurinë kombëtare dhe ndërkombëtare. Ai shton më tej se vjedhja e qindra pasaportave shqiptare në Athinë përbën një superskandal, rrezik serioz për sigurinë kombëtare jo vetëm të Shqipërisë, por dhe më gjerë.
“Burime serioze njoftojnë se “vjedhja” e tyre duket se është realizuar kundrejt shumës së paku 2 milionë euro. Ato mund të përdoren nga grupet më të rrezikshme terroriste të ISIS që po largohen nga Siria, por edhe nga baronët e drogës të Shqipërisë, Ballkanit dhe Amerikës Latine etj”, shkruan ndër të tjera Berisha në rrjetin social.
