Thellohet skandali i lirimit të 9 personave të arrestuar nga forcat e FNSH dhe RENEA në fshatrat Llakatund dhe Drithas të Vlorës, ku u sekuestruan më shumë se 20 ton drogë Canabis Stativa. Lirimet e personave kryesorë që kishin grumbulluar drogën dhe që dyshohet të jenë pronarët e drogës, janë liruar dy ditë pas arrestimit.
Sipas kërkesës së bërë nga Prokuroria, dokument që gazeta “Shqiptarja.com” e disponon, lirimi është bërë me urdhër të vetë prokurorisë së Vlorës e cila ka kërkuar në gjykatë për ta masën e sigurisë “Detyrim paraqitje në policinë gjyqësore” dhe jo masën e “arrestit në burg”, për dy të arrestuarit e akuzuar për “Shitje të lëndëve narkotike” dhe “Armëmbajtje pa lejë”.
Nuk dihet nëse prokuroria do nisi një inspektim për prokurorët e Vlorës, pasi operacioni “Llakatundi” është shpërbërë në bashkëpunimin prokurori-gjykatë. Sipas Ka qenë prokurorja Flora Çela, e cila në kërkesat e saj i është drejtuar gjykatës në korrik 2017, tre ditë pas superoperacionit policor në Llakatund dhe Drithas, duke kërkuar lirimin e shtetasit Myzafer Tushaj dhe djalit të tij Ervin Tushaj dhe caktimin ndaj tyre masën e “Detyrimit për paraqitje në policinë gjyqësore”.
Kjo kërkesë e prokurorisë, ka habitur vetë gjykatësen e Vlorës Elona Mihali, e cila gjatë shqyrtimit të masës së sigurisë ndaj këtyre personave, ka vendosur të pranojë kërkesën e prokurorisë së Vlorës, por nuk ka urdhëruar që këta persona të paraqiten pranë policisë gjyqësore, po ka vendosur një masë tjetër sigurimi për ta, duke urdhëruar sekuestrimin e pasaportave dhe ndalimit e tyre për të dalë jashtë shtetit, shkruan Shqiptarja.com
Myzafer dhe Ervin Tushaj, janë të parët që çanë rrjetën e drejtësisë në Vlorë, ndërkohë që pas kësaj kërkesë të bërë nga prokuroria, gjykata e Vlorës ka rrëzuar prokurinë në kërkesat e tjera, pavarësisht se prokuroria ka kërkuar “arrest me burg” për të arrestuarit. Disa prej tyre kanë dalë në shkallën e parë, ndërsa disa të tjerë janë liruar nga gjykata e Apelit.
