Presidenti i Republikës, Ilir Meta e ka konsideruar si të papranueshme dhe të dënueshme ligjërisht, situatën e rëndë mjedisore përgjatë bregdetit të Adriatikut, ku janë grumbulluar dhe djegur rreth 40 ton mbetje.
Sipas tij, ky krim mjedisor me pasoja të rënda, po dëmton imazhin e Shqipërisë, në prag të sezonit turistik.
Ndër të tjera, Meta shprehet se kjo situatë kërkon reagim të menjëhershëm efektiv të pushtetit vendor dhe të institucioneve përgjegjëse për mbrojtjen e mjedisit, si dhe ndëshkim nga drejtësia.
”E papranueshme dhe e dënueshme ligjërisht situata e rëndë mjedisore, në prag emergjence, e shkaktuar nga mbeturinat në qendrat urbane dhe përgjatë bregdetit të Adriatikut, veçanërisht në kulmin e sezonit turistik. Ky krim mjedisor, me pasoja të rënda për shëndetin e banorëve dhe të turistëve, për florën e faunën dhe që dëmton imazhin e Shqipërisë, meriton ndërgjegjësim dhe reagim të menjëhershëm efektiv të pushtetit vendor dhe të institucioneve përgjegjëse për mbrojtjen e mjedisit, si dhe ndëshkim nga drejtësia.’’, shkruan Meta në rrjetin social, Fcaebook.
