Sa i takon skandalit me atleten bjelloruse, Komiteti Olimpik ka përjashtuar nga Olimpiada trajnerët e saj. Katër ditë pasi ata urdhëruan Kristina Timanovskaja të kthehej në shtëpi me urdhër të dikatorit Lukashenko, Komiteti Olimpik Ndërkombëtar ka shkarkuar dy trajnerët.
Komiteti i hoqi të drejtën e trajnimit Artur Shimak dhe Juri Maiseviç, duke u kërkuar të largoheshin menjëherë nga Fshati Olimpik. Timanovskaja, 25-vjeç, refuzoi të hipte në avion për në Bjellorusi pasi trajnerët e tërhoqën nga gara 200 metra e së hënës dhe e urdhëruan të braktiste Olimpiadën.
Komiteti Olimpik Bjellorus pretendoi se Timanovskaja po tërhiqej nga gara për shkak të “gjendjes së saj emocionale, psikologjike”, por ajo i tha “Reuters” se ishte detyruar të shkonte në shtëpi, sepse kishte kritikuar trajnerët në mediat sociale.
Çështja u bë një skandal i madh, aq sa atletja u detyrua të kërkojë azil politik në Poloni për shkaqe sigurie.
Atletja olimpike bjelloruse kërkoi azil në Poloni, pasi u kërcënua me kthim të detyruar në Minsk, menjëherë pasi kritikoi trajnerët në Lojërat Olimpike të Tokios.
25-vjeçarja u filmua duke arritur në Ambasadën Polake në Tokio të hënën, ku thuhej se ajo po kërkonte strehim nga presioni zyrtar për t’u kthyer në Bjellorusi, të paktën sipas raporteve të mediave. Ajo ishte e mbrojtur nga Fondacioni Bjellorus, Solidariteti për Sport (BSFF), i cili tha se kishte frikë nga dëbimi i detyruar në Minsk.
