“Bashkia e Tiranës po vret në mënyrë monstruoze qentë e rrugës, ndonëse financohet për tu kujdesur për to, për t’i vaksinuar, sterilizuar dhe matrikuluar”. Ka qenë ky denoncimi i bërë prej ARSA dhe shoqërisë civile.
Ndërkohë që Bashkia e Tiranës, rreth 2 vjet më parë nisi projektin e sterilizimit të qenve. Të cilët më pas vaksinohen, i vendoset një pullë në vesh dhe lëshohen sërish në rrugë. Shërbimi Veterinar thotë që numri i qenve endacak është ulur ndjeshëm, por sipas shoqërisë civile këtu qëndron e gjithë kleçka.
“Me një deklaratë të tillë, Bashkia fundos veten, pasi jeta e një qeni pas sterilizimit nuk është 2 vjet. Ndaj, kjo gjë e tregon qartë se çfarë po ndodh me ata qenë,”- thotë për Tirana Today një qytetare.
Organizata për mbrojtjen e kafshëve në Shqipëri “Animal Rescue Albania” ka zbuluar një dokumentacion, i cili tregon se Bashkia e Tiranës dhe Agjencia për Mbrojtjen e Konsumatorit, në 2017-ën ka kryer një marrëveshje për marrjen e medikamenteve që sigurojnë vrasjen e qenve të rrugës.
Në dokumentet e siguruara thuhet se kryetari i Bashkisë Tiranë, Erion Veliaj dhe bashkëpunëtorët e tij kanë vënë në jetë planin për vrasjen dhe shfarosjen e 2300 qenve endacakë në Tiranë.
Sipas, aktivistit Sazan Guri, ata do të vazhdojnë të bëjnë tubime të tjera, për sa kohë, Bashkia nuk ndalon me vrasjet e tmerrshme që i bëhet qenve. Ai shton për Tirana Today se Bashkia për 7€ që është sterilizimi i qenve, merr 230€.
Qytetarët shprehen të revoltuar dhe bëjnë thirrje për ndërgjegjësim jo vetëm nga ana e institucioneve, por edhe nga shoqëria. Njerëzit të bëhen më të ndjeshëm ndaj një fenomeni të tillë. Tirana Today
