Emisioni BOOM ka trajtuar sot rastin e një të moshuari, i cili prej 4 vitesh nuk merr pension.
Bëhet fjalë për Çaush Muskallari, i cili edhe pse ka mbushur moshën për pension pleqërie ka katër vjet që nuk del në pension për shkak të një ngatërrese që i kanë bërë në regjistrin e kooperativës bujqësore ku ka punuar 25 vjet.
Nga Muskallari mbiemrin ja kanë venë Xhafka. Datëlindja dhe atësia nuk ndryshojnë por ndryshon mbiemri.
Sipas tij për këtë duhet hapur një gjyq, por ai nuk ka asnjë të ardhur për të hapur gjyq dhe për të bërë njohjen e viteve të punës, ndaj ka 4 vjet që se gëzon këtë të drejtë. Ai bën thirrje për ndihmë, nëse dikush mund të ndjek në gjykatë këtë problem dhe ai ta shlyej pasi të marrë pensionin këtë detyrim ndaj avokatit.
Çaush Muskallari: Jam 69 vjeç, nuk më del pensioni. Vitet i kam 25 dhe një vit kam punuar në minierë. Më sjellin pengesë për mbiemrin. Unë mbiemrin e kam Muskallari. Mua nuk më njohin asnjë vit pune. Unë kam hedhur firmën në bordero, të ma japin mua ta shoh si e kam hedhur firmën me mbiemër Muskallari apo Xhafkallari. Më kanë thënë të hap proces gjyqësor, por unë nuk kam asnjë të ardhur. Unë do t’i lutem një avokati shtetëror që të ndjekë rastin tim në gjykatë. Unë dua vetëm të drejtën.
BOOM kontaktoi edhe me Institutin e Sigurimeve Shoqërore. Ajo që të bie në sy në përgjigjen e Institutit të Sigurimeve Shoqërore është fakti se vetë ISSH ka zbuluar disa detaje që tregojnë që ky është një gabim material, dhe se bëhet fjalë për të njëjtin person.
“Nga verifikimet nuk ekziston asnjë person me gjeneralitete Çaush Xhafka dhe Çaush Sefedin Xhafka në 12 Drejtoritë Rajonale të Sigurimeve Shoqërore dhe në Zyrën e Gjendjes Civile”, thuhet në përgjigjen e ISSH.
Po a e përfiton mbrotjen falas zoti Çaush?
BOOM shkoi pranë zyrës së ndihmës ligjore falas tek ministria e drejtësisë për të kuptuar nëse mund të ofrohej ndjekje e këtij rasti, por për momentin, ofrohet vetëm këshillim na thanë, nuk ofrojnë avokat.
Gazetari: Çfarë asistence mund t`i jepni ju këtij?
Përfaqësuesi i zyrës së ndihmës ligjore: Nga ana jonë në këtë lloj pike nuk jepet dot asnjë lloj asistence. Ligji për ndihmën juridike parashikon dy faza. Faza e parë është faza këshillimore, faza e dytë është dhënia e avokatit falas. Vënia e avokatëve falas jepet mbi disa premisa që qytetari duhet të plotësojë disa kushte kryesisht ekonomike, pra nuk ka të ardhura ekonomike të mjaftueshme për të vajtur në gjykatë, por kjo lloj faze për momentin nuk ofrohet sepse janë disa organe të cilat nuk kanë marrë miratim nga organet më të larta për të vazhduar më tej këtë punë.
Kjo është faza tranzitore pasi ligji e ka përcaktuar shumë qartë që do jepen avokatë falas, se kush janë fashat në shoqëri, por kemi një fazë përgatitore që mund të zgjas 1 muaj, 30 ditë 20 ditë, 40 ditë, 50 ditë dhe nuk të ofrohet dot.
Pra shteti nuk e ndihmon dot zotin Çaush. Atëherë thirrja është nëse ndonjë avokat, sigurisht e merr përsipër ta ndihmojë për ta përfaqësuar këtë të moshuar në gjykatë për të fituar të drejtën e pensionit, të kontaktoj me emisionin “Boom”.
