Tashmë është bërë publike video-ja kur i vihet tritoli lokalit të efektivit të policisë në Shkodër, Ndrek Rrasa. Në pamje të parë personi që vendos tritolin duket si grua. Duke parë më në imtësi lëvizjet e autorit, ka dyshime të arsyeshme që në fakt bëhet fjalë për një mashkull të maskuar si grua. Personi në fjalë është filmuar teksa ndez lëndën plasëse dhe e hedh në derën e lokalit të efektivit në fshatin Grudë e Re.
Më pas autori drejtohet për tek furgoni në pronësi të efektivit Rrasa, i parkuar aty pranë dhe i vendos flakën.
Nuk dihen ende shkaqet dhe rrethanat e kësaj ngjarjeje të rëndë, ndërkohë që policia po vijon punën për identifikimin e autorit.
Ngjarja ka ndodhur rreth orës 02:20 minuta të mëngjesit në fshatin Grudë e Re në Shkodër, aty ku ndodhet lokali i efektivit.
Gjatë marrjes në pyetje në lidhje me ngjarjen, efektivi i policisë ka deklaruar se nuk ka asnjë konflikt me persona të tjerë. “Nuk kam konflikte me persona të tjerë, dhe nuk e kam idenë se kush mnd ta ketë vënë tritolin apo se kush e ka djegur autobusin”, ka deklaruar 46-vjeçari.
Shkodër/Informacion paraprak
Rreth orës 02:20, në fshatin Grudë e re, Shkodër, ka shpërthyer lëndë plasëse në derën e lokalit të shtetasit N. Rr. 46 vjeç , banues në fshatin Grudë e re, me detyrë punonjës policie pranë Komisariatit të Policisë Shkodër.
Për pasojë ka vetëm dëme materiale në lokal si dhe është dëmtuar edhe mjeti i tij autobus, i parkuar para lokalit.
Grupi hetimor nën drejtimin e Prokurorisë së Rrethit Gjyqësor Shkodër, po punon për zbardhjen dhe sqarimin e plotë të kësaj ngjarje.
