Pas mbylljes së takimit të ministrave të Jashtëm të BE-së, ka reaguar edhe eurokomisioneri Johannes Hahn.
Përmes një postimi në “Twitter”, komisionari evropian për Zgjerimin shkruan se ndihet i keqardhur që vendet anëtare nuk ranë dakord për hapjen e negociatave me Shqipërinë dhe Maqedoninë e Veriut.
Sipas tij, ky është një moment i vështirë dhe jo lavdie për Evropën.
“Me keqardhje shumë që Shtetet Anëtare nuk kanë mundur të marrin një vendim për hapjen e negociatave të anëtarësimit me Maqedoninë e Veriut dhe Shqipërinë. Ky nuk është një moment lavdie për Evropën, është hera e tretë në 16 muaj që po diskutojmë për këtë çështje të rëndësishme!
E rëndësishme për të theksuar është se shumica e vendeve anëtare mbështesin rekomandimin e KE! Çdo vonesë e mëtejshme do të dëmtojë rolin tonë në Ballkanin Perëndimorë, besueshmërinë e ambicies sonë për t’u bërë një lojtar global më i fortë.
Ne duhet të rivendosim besueshmërinë në Ballkanin Perëndimorë dhe të përmbushim angazhimet tona! Maqedonia e Veriut dhe Shqipëria kanë bërë detyrat e tyre të shtëpisë dhe kanë zbatuar reforma të dhimbshme. Integrimi në BE është një proces i bazuar në meritë dhe kjo është arsyeja pse ne duhet të pranojmë përparim konkret”, shkruan Hahn.
