Beteja ligjore e ish-ministrit të Brendshëm Saimir Tahiri vazhdon në organet e drejtësisë shqiptare, ndërsa sot Prokuroria i ka bërë rekurs në Gjykatën e Lartë vendimit të marrë nga Gjykata e Apelit, e cila vendosi t’i rikthente pasaportën ish-ministrit.
Ndërkohë organi i akuzës ka kërkuar që t’i bllokohet pasaporta Tahirit.
“Prokuroria kërkon nga Gjykata e Lartë që të vendosë sërish masën shtrënguese për bllokimin e pasaportës për Tahirin. Organi i akuzës e ka depozituar kërkesën për rekurs në datë 7 shkurt, ndërsa ende nuk është caktuar se kur do të zhvillohet seanca e parë”-shkruan Shqiptarja.com
Kujtojmë që Apeli ia riktheu pasaportën ish-ministrit në datë 26 dhjetor të vitit të kaluar duke i hequr masën e ndalimit të lëvizjes jashtë vendit.
Saimir Tahiri po hetohet nga Krimet e Rënda, pasi akuzohet se ka favorizuar anëtarët e dyshuar të grupit Habilaj në trafikun e kanabisit dhe drogës nga Shqipëria në drejtim të Italisë. Tashmë pritet të shihet se si do të jetë rezultati pas këtij rekursi nga Prokuroria.
