Kryeministri Edi Rama është prononcuar për mediat pas mbledhjes së sotme të Kryesisë së PS-së, e cila zyrtarizoi listën e kandidatëve të partisë për zgjedhjet vendore të 30 qershorit.
“Kemi pasur mbledhjen e Kryesisë për kandidaturat për 61 Bashkitë, dhe për të diskutuar për listat përfundimtare për Këshillat. Nesër të gjithë të deleguarit do të jenë në qarkun përkatës, për të shpallur kandidaturat e miratuara në prani të kandidatëve të grupeve drejtuese të fushatave, dhe më pas do të fillojmë fushatën.
Në Peqin kemi vendosur për të gjitha Bashkitë, janë disa detaje të fundit që janë çështje qarqesh dhe nuk ka asnjë problem, të deleguarit kanë mandatin per ti konkluduar per të gjitha”, tha Rama.
Teksa kanë ngelur vetëm pak ditë nga fushata zgjedhore, Rama duket se do të bëjë paqe me gazetarët.
“Jeni bërë shumë të mirë, edhe unë do bëhem shumë i mirë me ju!”, u tha ai gazetarëve para se të largohej nga selia e PS-së, ku u mbajt mbledhja e Kryesisë së socialistëve. Kujtojmë se në fjalimet e tij, ai e cilësonte median si ‘kazan’.
