Edhe pse bilanci nga koronavirusi në Spanjës është përmirësuar ndjeshëm në krahasim me ditët e mëparshme, prapë numri i viktimave vijon të jetë i lartë.
Sipas mediave të huaja, në 24 orët e fundit në Spanjë janë shënuar 435 viktima, 5 më shumë se dje ku u regjistruan 430 të vdekur.
Ndërkohë një rritje e ndjeshme shihet edhe te numri i rasteve të reja. Sot janë shënuar 4,211 raste, dje u regjistruan 3,968 ndërsa një ditë më përpara vetëm 1,536 raste infektimi.
Me 208,389 raste infektimi, Spanja renditet e dyta në botë për numrin më të madh të personave të infektuar nga virusi vdekjeprurës. Vendin e parë e mban SHBA me rreth 820 mijë raste infektimi.
Që nga shpërthimi i pandemisë, në Spanjë janë shënuar 21,717 viktima, ndërsa 85,915 persona kanë arritur ta mposhtin virusin.
Tani për tani në Spanjë regjistrohen 100,757 raste ende aktive, teksa 7,705 persona ndodhen në gjendje të rëndë për jetën.
Më shumë se 2,5 milionë njerëz nga e gjithë bota janë prekur nga COVID-19, ndërsa mbi 178 mijë persona kanë humbur jetën.
