Ndërsa vë theksin te krimi ekonomik, krimi i organizuar, e korrupsioni, Shërbimi Informativ i shtetit bën me dije se vitin e shkuar ka referuar në Drejtorinë e Parandalimit të Pastrimit të Parave 50 raste të dyshimta. SHISH raporton gjithashtu se krimet në ekonomi mbeten faktor me rrezikshmëri të lartë për rritjen e qëndrueshme ekonomike, besueshmërinë dhe stabilitetin e sistemit financiar e atij ekonomik në vend, ndërkohë që paratë e pista po investohen në sektorë jetikë për zhvillimin e vendit.
Alarmi kësaj here vjen nga Shërbimi Informativ i Shtetit, që raporton se përshpejtimi i globalizimit ekonomik, mbështetur në tregjet financiare globale dhe strategjitë e tregut të lirë, e kanë pakësuar rëndësinë e kufijve dhe kanë krijuar mundësi të reja për krimin ekonomik.
Ndër aktivitetet më të përhapura të krimeve në ekonomi SHISH evidenton mashtrimet në fushën e taksave dhe doganave, hartimin e faturave fiktive të shit-blerjes, krijimin e operatorëve ekonomikë fiktivë, kontrabandën e mallrave të akcizës, pastrimin e parave të gjeneruara nga aktiviteti kriminal.
Faktorë favorizues evidentohen korrupsioni dhe niveli i informalitetit në ekonomi. “Në vendin tonë, një sasi e konsiderueshme e parave “të pista” e ka origjinën nga aktiviteti kriminal ndër vite i individëve dhe grupeve të përfshira. Të ardhurat e fituara në mënyrë të paligjshme janë investuar në vijimin e aktiviteteve kriminale, si dhe në biznese të ligjshme. Sektorët mbizotërues për pastrimin e parave mbeten biznesi i ndërtimit, pasuritë e paluajtshme, hoteleri-turizmi, etj. Zonat bregdetare e ato urbane mbeten më tërheqëset, pasi ofrojnë potencial për kthimin shumëfish të investimit fillestar. /SCAN
