Mjeku infeksionist, Pëllumb Pipero, ka dhënë disa zgjidhje në rastet kur në institucionet arsimore mund të shfaqen edhe persona të prekur me koronavirus.
Në një bisedë në emisionin ‘Rudina’, Pipero tha se nëse do ketë raste pozitive me hapjen e shkollave, zgjidhja nuk do të jetë mbyllja e institucionit.
“Hapja e shkollës është një lajm shumë i mirë. Unë kam qenë pro hapjes së shkollës, madje i përmbahem thënies ‘hapja e shkollave është hapje e shoqërisë’. Të mos nxitojmë në këtë pjesë, sepse, nëse në shkollë na del një rast pozitiv ndaj Covid-19, nuk është zgjidhje mbyllja. Nuk duhet të mbyllet shkolla, por duhet të gjejmë mënyrat për të izoluar rastin dhe familjen pa ndërprerë procesin”, tha ai.
Pipero këshillon prindërit që të punojnë fort me fëmijët e tyre, në mënyrë që t’i bindin ata për të respektuar me përpikëri rregullat strikte për sigurinë e shëndetit.
“Prindërit duhet të punojnë me fëmijët, t’i kritikojë fëmijët pa i stresuar. Nëse tregoni kujdes për duart, për bankën, nëse respektoni orën e mësimit, pushimet gjithashtu, nëse zbatoni rregullat dhe kufizoni aktivitetet, çdo gjë mund të vijojë normalisht”, tha mjeku i njohur.
