Të gjithë e mbajnë mend deklaratën e kryetarit të Bashkisë së Durrësit, pak muaj më parë në emisionin Opinion pasi dolën përgjimet e para të dosjes 339/1. Në atë kohë Vangjush Dako do të deklaronte se ishte superman dhe ishte akullore. Por me përgjimet e reja të gazetës gjermane Bild duket se akullorja shkriu.
Blendi Fevziu: Po pse më ça je ti, superman-i?
Vangjush Dako: Superman jam, po më superman jam, po ta them, unë në fushatë jam Superman.
Dhe më tej vazhdoi: Unë jam njeri me reputacion jo vetëm në Durrës, por në të gjithë Shqipërinë. Unë jam akullore, duart e mia janë akullore të pastërta dhe jo si kreu i opozitës që i ka me gjak dhe të zeza“.
Vangjush Dako, kryetari i Bashkisë së Durrësit, rezulton të jetë përgjuar gjatë nga Prokuroria e Krimeve të Rënda në bisedë telefonike me një person që në dosjen e organit të akuzës identifikohet si “Niçja” (Altin Avdyli). Por jo vetëm me Niçen edhe me vëllain e tij, Astritin.
Pesë përgjimet e reja të publikuara nga gazeta gjermane hedhin poshtë alibinë e Dakos gjatë emisionit Opinion, se ai fliste me këta personazhe si me çdo njeri tjetër që sihte pjesë e fushatës.
Blendi Fevziu: Kush është ky që flet?
Vangjush Dako: “Niçja” është një qytetar i Durrësit që është kapur, me të cilin kam folur. Në çdo fushatë, kur mbaron takimi elektoral, unë falenderoj njerëzit. Unë kontaktoj me ta, u çoj letra falenderimi. Kurse Astriti është i vëllai i Niçes. Kjo është politika. Minimumi është një telefonatë.
Këto përgjime, të përmbledhura, tregojnë se si Niçja dhe vëllai i tij kanë gjithçka në duar në Durrës dhe në Shijak, madje mund të propozojnë dhe emra për kandidat për deputet.
***
Astrit Avdylaj është përgjuar duke biseduar në telefon me Arjan Ndraxhin, vëllain e Ilir Ndraxhit, deputetit të ardhshëm të Partisë Socialiste. Ai pyet nëse ka ardhur apo jo konfirmimi për futjen e Ndraxhit në listat e PS, konfirmim që vjen disa ditë më pas.
Sipas bisedës kuptohet se në lista duhet të futej edhe Elton Arbana, por më pas marrëveshja ndryshon. Elton Arbana është sot kandidat i Partisë Socialiste për Bashkinë Shijak në zgjedhjet e 30 qershorit. Avdylaj dëgjohet t’i thotë Arjan Ndraxhit se po punon për të siguruar fitoren e pastër të Partisë Socialiste në zonë.
***
Në një prej përgjimeve zyrtare të Prokurorisë, pjesë e dosjes 339/1, të botuara nga gazeta gjermane “Bild”, Astrit Avdylaj dëgjohet teksa i kërkon drejtorit të Ujësjellës-Kanalizimeve Durrës, listën e punonjësve të institucionit që ai drejton, të cilët mund të jenë mbështetës të Partisë Demokratike. Sipas “Bild”, telefonata ka ndodhur në muajt para zgjedhjeve të përgjithshme të qershorit 2017./ Opinion.al
E PLOTË/ Përgjimet E ZBARDHURA, Bild nxjerr bisedat: Si manipuloi mafia zgjedhjet në Shqipëri
