Gjenerali nga Firence, ishte pjesë e Komisionit Ndërkombëtar të Përcaktimit të Kufijve. Pas përfundimit të misionit në veri, komisioni po haste shumë vështirësi me palën greke, që vazhdonte të kishte pretendime të reja territoriale ndaj Shqipërisë. Më 27 gusht 1923, Telini ishte duke udhëtuar me kolegët nga Janina në Kakavijë, kur ra pre e një atentati, duke gjetur vdekjen e menjëhershme. Italia reagoi ashpër.
Benito Musolini i dërgoi Athinës një ultimatum të fortë, ku u kërkoi 50 milionë lira dëmshpërblim, dhe ekzekutimin e vrasësit. Qeveria greke e sfidoi ultimatumin, teksa italianët pushtuan më 31 gusht ishullin e Korfuzit. Greqia njoftoi Lidhjen e Kombeve, që ndërmjetësoi arritjen e një kompromisi. Në fund, Athina e pranoi përgjegjësinë e vrasjes, kërkoi ndjesë dhe pagoi gjobën prej 50 milionë lirash.
Italia u largua nga Korfuzi më 27 shtator 1923. Sipas historianëve Telini ishte vënë në shenjëstër, pasi ishte i vendosur të korrigjonte padrejtësinë e 1913-ës, që iu bë pjesës jugore të Shqipërisë etnike. Ai po bëhej gati ta shpinte vijën e kufirit të Shqipërisë deri në Kallamata dhe në gjithë Çamërinë Veriore, duke përfshirë edhe Janinën me rrethinat e saj. Ndaj kishte vetëm një mënyrë që qarqet greke ta ndalonin, duke e eliminuar fizikisht.
