26-vjeçari Jurgen Kurti i cili mbeti i vrarë mbrëmjen e djeshme në Tiranë, nuk ishte emër i panjohur për mediat, por dhe për policinë. Me drejtësinë ai ishte përballur dy herë, në të dyja rastet për vrasje. Por më vonë ishte shpallur i pafajshëm. Nga ana tjetër, ai njihej edhe për jetën e tij të luksit.
Detajet
Dy persona që dyshohet se po e prisnin në hyrjen e pallatit, që ndodhet në rrugën “Zef Jubani”, mbrapa Postës nr.8 në Tiranë, e kanë qëlluar për vdekje me 3 plumba. Ngjarja ndodhi rreth orës 22:20, kur Jurgen Kurti po shkonte në shtëpinë e tij.
Policia zyrtarisht tha se ngjarja ka ndodhur në rrethana ende të paqarta. Burime nga grupi hetimor deklaruan se atentatorët dyshohet të kenë qenë dy persona, që kanë lëvizur me motor, duke u larguar menjëherë nga vendi i ngjarjes.
I riu ka mbetur i vdekur në vend, ndërsa policia ka shkuar menjëherë në vendngjarje sapo është njoftuar nga dëshmitarët. Pas ekzekutimit mafioz, familjarët dhe e fejuara e Jurgen Kurtit janë mbledhur në vendin e ngjarjes, ku kanë shpërthyer në lot.
Mësohet se e ëma e 26-vjeçarit ndodhej në shtëpi në momentin kur i biri po shkonte ta takonte, por nuk arriti dot të ngjitej deri në katin e gjashtë. Krimi ndodhi në të njëjtin pallat ku tri vite më parë mbeti i vrarë babai i Jurgenit, Artur Kurti.
