Këngëtari i njohur Gëzim Nika, i cili tashmë jeton prej vitesh në Amerikë ka qenë i ftuar mbrëmjen e sotme në “Mos i fol Shoferit”, nga ku tregoi se fillimisht shkoi në Amerikë vetëm për të bërë koncerte, por kur djali u bë dy vjeç vendosi të shpërngulej me të gjithë familjen.
“Megjithëse sot gratë po ikin në Amerikë të lindin, nusja ka ardhur shtatzënë 4 muajshe me djalë. Cunin e kemi tiranas, i vetmi që ka lindur në Tiranë. Por pa u bërë dy vjet u kthye atje ku ishte nisur”, tha Nika.
Po ashtu, Nika rrëfeu dhe një histori gjatë fillimeve të emigrimit, ku tregoi se nga gëzimi i madh shtyu vizën për të parë një ndeshje futbolli.
“Nga fundi i 1997-ës jam larguar. Në fakt, në Amerikë kam shkuar në fund të 1991-it bashkë me gruan, kemi bërë koncert, jemi kthyer. Kam shkuar në ’93-’94 një vit. E shtyva pak se ishte kampionati botëror dhe unë si katunar nga Tropoja, të shihja ndeshje në stadium ishte gëzim i madh, prandaj e shtyva vizën dhe u ktheva me mendimin që Shqipëria do jetë e do bëhet”, u shpreh Gëzim Nika.
