“Arrest me burg” është masa e caktuar nga Gjykata e Shkallës së Parë Gjirokastër për 61-vjeçarin Vasil Mullaj, i akuzuar për ngacmim seksual ndaj 3 të miturave. 61-vjeçari ka humbur ndjenjat, pasi dha versionin e tij për ngjarjen e ndodhur para katër ditëve. Pasi foli për një orë, ai u rrëzua në tokë ndërsa gjykatësja ndërpreu seancën. Prej tre ditësh, Mullaj është futur në grevë urie në formë proteste, ndaj akuzës që ai e cilëson të padrejtë.
Varianti i ngjarjes sipas 61-vjeçarit
Vasil Mullaj ka pohuar se kishte dëbuar nga oborri i shtëpisë fëmijët, që luanin me nipërit dhe mbesat e tij. Ai tha në gjyq se zhurma që shkaktonin fëmijët, ishte shumë e padurueshme, aq sa në një moment ka reaguar edhe duke i shtyrë fëmijët, veprime që u interpretuan nga prindërit e tyre si ngacmim seksual.
Por në dosjen e përgatitur nga prokurori Julian Çafka, nga dëshmitë e prindërve, ata pretendojnë se 61-vjeçari i ka ngacmuar fëmijët e tyre në vendet intime. Sipas dëshmive, ai u kishte ngritur fustanin fëmijëve, dhe i ka prekur në organet intime. Këto pretendime janë kundërshtuar nga i pandehuri dhe avokati i tij Bernard Aliko.
Ky i fundit ka kërkuar prova të besueshme për klientin e tij, duke sjellë në vëmendje përplasjet e vjetra mes familjeve, që sipas tij janë shkak i kësaj ngjarje.
Aliko kërkoi nga kryesuesja e trupës gjykuese që të merren prova të tjera ligjore, për të vërtetuar akuzën. Për këtë, gjykata vendosi “arrest me burg” 45 ditor, deri sa organi i akuzës të sjellë prova të tjera.
61-vjeçari është denoncuar nga dy familje me të cilat ka dhe lidhje krushqie, me akuzën se ka ngacmuar seksualisht tre vajza të mitura. 61-vjeçari u arrestua pasi kishte ngacmuar seksualisht tre vajza të mitura të moshës, 7, 8 dhe 14 vjeçe.
