Kryetarja e LSI-së, Monika Kryemadhi ka sulmuar nga Konventa Kombëtare kryeministrin Edi Rama.
Ajo ironizoi me përkufizimet e vetë kryeministrit për të, teksa tha se “si doktoreshë dhe si fallxhore e parashikon të ardhmen e Shqipërisë të ndritur.
“Si një doktoreshë dhe fallxhore, e parashikoj të ardhmen e Shqipërisë të ndritur pa Edi Ramën kryeministër. Shqipëria është më e mirë pa Edi Ramën. Ka ardhur koha t’i jepet fund tranzicionit të zgjatur 30-vjeçar, që Shqipëria të bëhet europiane me djem dhe vajzat e reja plot energji, për të zhdukur bandën kriminale në pushtet”, tha Kryemadhi.
Ajo tha se LSI-në e bën shpirti, e bën ndjenja dhe dashuria për njëri-tjetrin, ndërsa pranoi se partia e saj ka po ashtu gabimet e veta, ndërsa ftoi më tej të gjithë socialistët e zhgënjyer që t’i bashkohen LSI-së:
“Më erdhi keq për Samitin e Berlinit kur pashë që në krah të kryeministrit të vendit tim nuk kishte njerëz me reputacion, seriozë e me nivel qoftë edhe të PS. Shqipëria vërtetë është e varfër, por njerëzit nuk u kanë munguar asnjëherë asaj, sidomos PS-së.
Kryetari në ikje prodhon vetëm trishtim dhe dëshpërim. Ftoj të gjithë ata socialistë të tradhtuar që programin e saj, rilindja e ktheu në një grabitje të shtresës së mesme, i ftojmë dhe i hapim dyert për ata socialistë. Të luftojmë së bashku për ta bërë Shqipërinë shtëpinë e shqiptarëve.
Edhe ne kemi gabimet tona, e dimë shumë mirë që shqiptarët nuk presin që ne thjesht të ndërrojmë karrigen me Ramën.”
