Rudina Hajdari është një nga të paktët deputetë të opozitës të cilët nuk e kanë dorëzuar mandatin e deputetit, si pjesë e një veprimi të përbashkët që ndërmorën forcat politike në minorancë. Lidhur me këtë rast përjashtimor, ku pati një reagim zyrtar nga ana e vetë Hajdarit, një qëndrim ka ardhur edhe nga Grida Duma.
Deputetja demokrate, në një lidhje direkte nga selia e PD-së me emisionin “Top Talk”, iu përgjigj pyetjes mbi mundësinë e përjashtimit të Rudina Hajdarit, ashtu siç u veprua me Myslym Murrizin, i cili nuk pranoi të djegë mandatin e tij.
“Nuk bëhet me mua ky diskutim. Marrja e vendimit për këdo është bërë në Kryesinë e PD-së, ku kolegët kanë marrë fjalën dhe kanë thënë mendimin e tyre individualisht.
Unë besoj që ishte respektim statutor i statutit të ri (në rastin e Murrizit), ku është përfshirë edhe termi përjashtim.
Nuk dua të shprehem personalisht për këtë vendim, sepse është vendim nga forumet e partisë”, ka thënë Duma.
