Gjykata e Posaçme e Apelit, do të japë nesër vendimin për sekuestrimin e pasurive të biznesmenit Ylli Ndroqi. Shkak për shtyrjen e seancës, është bërë dosja voluminoze.
Avokati Alban Qafa tha për mediat se janë demonstruar të gjitha provat, dhe sipas tij, të gjitha pasuritë janë 100% të ligjshme dhe nuk ka burim parash të dyshimta.
Ai u shpreh më tej se beteja e tyre është përqendruar tek të gjitha pasuritë, dhe se Ndroqi nuk i fshihet drejtësisë.
“Pjesa e pasurive të Ylli Ndroqit është e ligjshme, kemi kërkuar shfuqizimin e vendimit të shkallës së parë, i kemi demostruar provat. Pjesa më e madhe janë të financuar nga bankat, nga aktiviteti tregtar.
Është 100% pasuri e ligjshme, dhe asnjë burim parash të dyshimta, me prova jo e jo. Ligji njeh indicie, por as në këtë rast as indiciet nuk ekzistojnë. Kjo pasuri është regjistruar nga Tatimet në 1993, kredituar në banka në 1996, është aktiviteti tregtar dhe biznesi i tij janë kontrolluar nga tatimet dhe kanë rezultuar pa probleme.
Ia demostruam gjykatës të gjithën. Beteja jonë është përqendruar te të gjitha pasuritë. Po depozituam një prove të re që nuk e kishim depozituar më parë. Vetë administratori i pasurive i caktuar nga shteti, ka marrë informacion nga banka për mjetet e “Ora News”, janë marrë me lizing. Si mund të sekuestrosh pasuri që janë marrë me lizing? E ka konstatuar dhe administratori këtë, prokuroria u shpreh që janë në fazën fillestare të hetimeve. Kërkuan që provat e marra t’i depozitojmë te ato. Nuk ka akoma një analizë financiare, se nuk është caktuar një ekspert.
Vazhdojnë verifikimet nga ana e Prokurorisë, pasi regjistrimi i procedimit është bërë 21 korrik, dhe ka qenë një periudhë e shkurtër dhe për ta. Depozituam dhe një kopje të pasaportës të Ylli Ndroqit, pretendohet se është arrestuar në shkurt të 2015, që është dhe si për barcaletë, vendimi i masës së arrestit është lëshuar në Milano 2006. Eshtë shfuqizuar në 2010.
Me vendim të shfuqizuar në 2010, se si mund të arrestohet një person në 2015 vetëm ata që e kanë shkruar, vetëm ata e dinë. Ndroqi në shkurt ka qenë në Mynih, në mars ka qenë në Moskë në korrik në SHBA, nuk ka asnjë arrestim për Ndroqin.
Nuk ka asnjë dokument nga Itali që thotë se Ndroqi ka qenë i arrestuar, por vetëm nga Interpol Tirana. Ministria e Brendshme e Italisë nuk ka një dokument që është arrestuar.
Zoti Ndroqi nuk i fshihet drejtësisë, po hetohet mbi bazë të disa indicieve, nuk ka kualifikimin për ta bërë vetë, ka zgjedhur avokatin. Kemi një mal me prova që janë fatura të shoqërisë se Prokuroria pretendon se 2003 ke pak të ardhura, 2005-2006 ke shumë të ardhura. Zoti Ndroqi do i bëj të ditura vetë, se kush politikan i bën presion, në kohën dhe në momentin e duhur”, tha avokati i Ndroqit.
