Në përpjekje për të frenuar koronavirusin, mbrëmjen e djeshme, kryeministri italian Giuseppe Conte ka nënshkruar dekretin për shtrirjen e masave kufizuese deri më 13 prill.
Ai ka deklaruar në konferencën për shtyp se nuk është koha për të hequr kontrollin nga liria e lëvizjes, dhe se italianët iu duhet që të sakrifikojnë.
“Nëse spekulojmë tani mbi kufizimet, përpjekjet do të ishin të kota”. Ai u shpreh gjithashtu se pas Pashkëve nis edhe faza e dytë e emergjencës shëndetësore, ajo e daljes në mënyrë graduale nga masat shtrënguese dhe e bashkëjetesës me Covid-19. Për të kaluar më pas në fazën e 3 që është dalja përfundimisht nga situata e rëndë, dhe rindërtimi i vendit nga pikëpamja ekonomiko-financiare.
Kryeministri italian duke iu përgjigjur pyetjeve të gazetarëve, tha se Mes, Mekanizmi Europian i Stabilitetit, nuk është i përshtatshëm për të përballuar këtë tsunam me rëndësi epokale. “Në këto kushte -tha Conte, Mes duhet të ndryshojë dhe të përshtatet dhe të na ofrojë mundësinë e krijimit të një strategjie europiane”.
