Kushtet e dhënies së lejeve të reja të ndërtimit tashmë kanë ndryshuar, dhe Sekretariati i Këshillit Kombëtar të Territorit e ka bërë më të vështirë dhënien e këtyre lejeve.
Tashmë ndërtuesit do të jenë të detyruar të paraqesin një vërtetim të Institutit të Monumenteve të Kulturës për prezencë ose jo të monumenteve në territorin ku aplikohet.
Gjithashtu janë të detyruar të paraqesin një vendim Këshillit Kombëtar të Restaurimeve, ndërkohë që aplikimi duhet të përmbajë Vlerësimin e Ndikimit në Mjedis.I detyrueshëm është edhe relacioni teknik i projektit, po ashtu edhe Grafiku i punimeve dhe organizimi i procesit të punës, bashkë me raportin gjeologo-inxhinierik, sizmik dhe hidrologjik.
Kur investimi do të kalojë vlerën e 100 milionë lekëve, për të marrë lejen e ndërtimit do të duhet edhe oponenca teknike nga Instituti i Ndërtimit.
