Duke parë numrin në rritje të të infektuarve dhe të vdekurve, frika shtohet për një izolim. Por shefi i Laboratorit të Mikrobiologjisë dhe pjesëtar i Komitetit Teknik, Andi Koraqi, e hodhi poshtë këtë tezë. I ftuar në emisionin “5 Pyetje nga Babaramo” në Report Tv, ai tha se nuk diskutohet mbyllja totale e vendit siç ndodhi prej më shumë se 3 muajsh, por mund të rishqyrtohen mbylljet e vogla.
“Mund të jenë efikase mbylljet lokale që kanë filluar në Europë, siç mund të mbyllet një zonë ose qytet. Mbyllje totale nuk do të ketë, ajo u bë për t’i dhënë kohë sistemit të shëndetësisë”, u shpreh Koraqi.
Në lidhje me virulencën e COVID-19, e cila sipas disa studimeve ulej me rritjen e temperaturës, ai tha se nuk ishte asgjë e provuar, por një hamendësi e të gjithëve. Po kështu ai zbuloi se janë 63 vaksina që mendohet se gjysma do të jenë gati në dhjetor. Për fat të keq, ende nuk kemi një medikament që ta zhdukë ose ta vrasi në mënyrë indirekte.
“COVID ka pësuar 40 mutacione pikësore që janë të parëndësishme, mutacioni i quajtur D614G që u shfaq në fund të marsit konsiston në ndryshimin e spikulave sipërfaqësore të virusit që shërbejë për futjen e tij. Virusi ka ndryshuar dhe është rritur trasmetueshmëria, pasi është bërë më i aftë për tu transmetuar. Jemi në një situatë të tillë që jemi duke e njohur virusin. S’jemi të aftë që ta sulmojnë, jemi në pozicion mbrojtës, ai është në sulm. Janë 63 vaksina që mendohet se gjysma do të jenë gati në dhjetor, nuk kemi asnjë medikament që ta zhdukë ose ta vrasi në mënyrë indirekte”, deklaroi ai.
