4700 shtëpi janë prekur nga përmbytjet që “pushtuan” të gjithë Shqipërinë vetëm para pak ditësh.
Sot, mijëra familje ende po mundohen t’i rikthehen normalitetit pas pasojave katastrofale të përmbytjeve.
Të prekura ishin edhe bizneset, ndërsa numërohen 65 ura të dëmtuara. Megjithatë, duket se shteti nuk do të mund t’i përballojë i vetëm bilancet e përmbytjeve, prandaj ka kërkuar ndihmën e bizneseve.
Është ministrja e Shtetit për Mbrojtjen e Sipërmarrjes, Sonila Qato ajo që ka kërkuar ndihmën e bizneseve në forma të ndryshme. Kështu, me anë të një postimi në Facebook, Qato shkruan:
“SOLIDARITET
Gjatë ditëve të fundit vendi ka kaluar në një situatë kritike për shkak të reshjeve të shumta dhe disa biznese janë prekur nga kjo lloj emergjence. Padyshim zyra të cilën përfaqësoj do të jetë një mbështetëse e problematikave të tyre. Nga sot në bashkëpunim me prefektët dhe pushtetin vendor do të jemi në krah për evidentimin e problematikave që ata tashmë po përballen.
Nga ana tjetër gjej rastin të bëj një apel në raport me ndihmën që secili nga ju mund të japë, ndihmë në veshje, ushqime, batanije, ujë e çdo lloj kontributi konkret në ndihmë të familjeve të prekura nga përmbytja.
Për çdo lloj iniciative ju lutem na kontatoni.”
