Kreu i PD-së Lulzim Basha ka reaguar pas akuzave të zv.kryeministrit Braçe se ai ka blerë shtëpi në Palasë në vlerën e 500,000 eurove.
Basha i quajti akuzat fushatë për baltosjen e tij dhe paralajmëroi se do të bëjë padi penale dhe për Braçen, për shpifje.
“Këta nuk kanë përgjigje për planin me 5 pika të PD dhe për të justifikuar paratë që do shkonin për familjet që nuk kanë të ardhura, shpifin. Erionin e kam çuar për shpifje për ndjekje penale. Por meqë është dhe ky i dyti, do e çoj dhe këtë për ndjekje penale për shpifje”, u shpreh Basha.
Sipas kryedemokratit, ai e ka deklaruar pasurinë që në vitin 2005 dhe çdo gjë është publike, ndaj ftoi kryeministrin Rama që t’i hetojë pasuritë e tij sepse policinë dhe prokurorinë e ka vetë.
“Pasuria ime është e deklaruar që në vitin 2005. E gjitha është një fushatë që ka për qëllim baltosjen time për të më penguar në mbrojtjen e interesit të qytetarëve. Të ardhurat e mia dhe pasuria ime kanë qenë të deklaruara që në vitin 2005. Kanë polici e prokurori, aty i kanë le ti hetojnë”, tha Basha në ‘ABC-ja e Mëngjesit’.
