Mediat franceze kanë nxjerrë në dritë detaje të tjera në lidhje me vrasjen e Brunilda Sadushi Kovaçit, natën e Krishtlindjeve në Mugins në afërsi të Kanës.
Raportohet se autori i kësaj vrasjeje të jetë një 28-vjeçar, i cili punonte si shofer kamioni. Ai është arrestuar që ditën kur ndodhi krimi. Ai ka pranuar krimin e tij në polici, duke u justifikuar se në momentin e aktit makabër ai kishte “humbur arsyen”.
Prokurori i çështjes, Fabienne Atzori, konfirmoi se i dyshuari 28 vjeç, kishte pranuar se kishte vrarë nënën me një fëmijë të mitur gjatë natës së 24-25 dhjetorit pas një mosmarrëveshje që kishte pasur me të.
28-vjeçari kishte paguar për të kryer marrëdhënie seksuale me Brunildën, të cilën më pas e ka vrarë. Shqiptarja u gjet më vonë e zhveshur dhe e djegur në një pyll.
“I riu pranoi se e kishte takuar viktímën në 24 dhjetor natën, pasi kishte kryer marrëdhënie seksuale me të, pasi për shkaqe që do të konfirmohen më vonë humbi arsyen e tij, e kishte mbytur atë dhe pasi kishte bërë këtë veprim zgjodhi ta transportonte viktímën në një vend që ai e dinte se ishte i përshtatshëm që të zhdukte trupin”, tha prokurori.
Prokurori nuk e ka bërë të ditur identitetin e autorit, ndërsa autopsia e viktimës pritet të kryhet të hënën.
