Problemet ekonomike, stresi dhe përdorimi i substancave narkotike janë shkaqet kryesore të rritjes së problemeve të shëndetit mendor te shqiptarët.
Kështu, 1 në 5 persona në Shqipëri është i prekur nga një çrregullim si ankthi, apo depresioni, që janë pjesë e grupsëmundjeve të shëndetit mendor.
Psikoterapistët japin alarmin duke vënë theksin se autoritetet shëndetësore duhet të bëjnë më shumë për të trajtuar probleme të shëndetit mendor.
“Vitet e fundit i është kushtuar gjithmonë e më pak rëndësi dhe prioritet nga institucionet shtetërore përkatëse kështu që pjesa më e madhe e problematikave ngelet vetëm në vullnetin dhe profesionalizmin e profesionistëve në trajtimin e këtyre çrregullimeve”, ka thënë Sonila Meçaj për Ora News.
Edhe psikoterapistja Anxhela Gramo sheh me shqetësim rritjen e përdorimit të drogave te të miturit, si një ndër shkaqet kryesore që këto sëmundje kanë pësuar rritje:
“Prindërit e kanë shumë të vështirë të kuptojnë fëmijët e tyre sepse në fakt kanë vështirësi të kuptojnë veten e tyre. Dhe fëmija e ndjen fare mirë këtë gjë. Dhe në momentin që nuk kuptohet nga prindi edhe pse tenton që të shpjegojë veten e tij atëherë ai do ti kthehet fare mirë sot përdorimit të një droge, duke gjetur aty një lloj ngushëllimi”.
