Inxhinieri Sokol Kikino theksoi edhe njëherë se pasgoditjet e tërmetit të fuqishëm që goditi vendin mëngjesin e 26 nëntorit do të vazhdojnë për 2-3 muaj.
I ftuar këtë të diel në “News24”, Kikino u shpreh se ka ardhur momenti që të bëhet Vetting edhe në inxhinieri. Sipas tij, duhet kalojnë në filtër të gjitha licensat, ndërsa bëri thirrje për një ndërhyrje radikale në legjislacion.
“Bëra një verifikim vullnetar në Durrës. Populli shqiptar betejën e ka me panikun, jo me tërmetin. Shqipëria është në gjendje të jashtëzakonshme dhe në këtë gjendje bëhen dhe veprime të jashtëzakonshme. Ju bëj thirrje kolegëve, siç bëra unë me kolegët e mi që i dërgova në terren për të punuar.
Nuk mund ta bëjnë as 20 grupe, por duhet të jenë më shumë, dhe kryesisht inxhinierë që kanë punuar. Njerëzit presin shpresë reale, ne japim shpresë shkencore. Të mos harrojmë se tërmeti i parë nuk ndodhi në shtator, ne jemi shkundur mirë në verë”, tha inxhinier Kikino mes të tjerash.
