Ministri i Jashtëm në detyrë, Gent Cakaj ka uruar shqiptarët e Tuzit. Me anë të një postimi në Twitter, Cakaj shprehet se vetëm të bashkuar, mund t’i shërbejmë interesave të shqiptarëve.
“#Tuzi na dha një mësim të vlefshëm se përtej logove, bindjeve politike apo protagonizmit, vetëm të bashkuar mund t’i shërbejmë interesave të shqiptarëve. Urimet më të përzemërta koalicionit “Forumi shqiptar” për rezultatin historik”, përfundon ai.
Kjo e dielë do të futet në historinë e shqiptarëve në komunën Tuz të Malit të Zi. Për herë të parë pas 62 viteve, atyre u jepet mundësia të qeverisin të pavarur nga Podgorica zyrtare.
Koalicioni “Forumi Shqiptar” ka fituar zgjedhjet në komunën e Tuzit. “Forumi Shqiptar” ka shënuar një fitore të thellë me 3780 vota, PDS ka marrë 2470 vota, SNP 81 vota, Demokratët 236 vota, Social Demokratët 356 vota dhe Boshnjakët 952 vota. Numri total i votave të numëruara është 7875.
Në votim ishin pesë lista, ndërsa të drejtën për të votuar e kishin 11.904 persona.
Kandidati shqiptar për drejtimin e komunës është Nikë Gjeloshaj. Kryetari i Komunës zgjidhet me shumicë të thjeshtë nga Këshilli Komunal, njohur si Parlamenti i Tuzit, që në total ka 32 anëtarë.
Partitë shqiptare morën pjesë të bashkuara në zgjedhje në siglën “Forumi shqiptar” dhe me sloganin “Malësia na bashkon”. Në të marrin pjesë Alternativa Shqiptare, Aleanca Demokratike dhe Unioni Demokratik i Shqiptarëve.
Në anën tjetër, Partia Demokratike e Socialistëve, e Presidentit Milo Gjukanovic, garoi më vete, ndërsa kandidatë kanë paraqitur edhe Partia Socialiste Popullore, Demokratët dhe Social Demokratët.
