Ministrja e Drejtësisë, Etilda Gjonaj, ka konfirmuar se Shqipëria është bërë pjesë e EUROJUST.
Përmes një postimi në Facebook, Gjonaj theksoi se ky institucion kyç i BE-së ka vlerësuar të gjithë bilancin e arritur nga ministria e Drejtësisë, duke e bërë pjesë me të drejta të plota.
Sipas ministres, përmes caktimit të një prokurori në zyrën e EUROJUST në Hagë, do të rritet më tej besimi i partnerëve të vendit, në vullnetin për të luftuar krimin e organizuar.
EUROJUST është institucion me seli qendrore në Hagë dhe aktualisht përbëhet nga mbi 100 prokurorë nga vendet e BE-së. Këtij institucioni i është besuar forcimi i luftës kundër krimeve të rënda, përmes bashkëpunimit më të ngushtë brenda BE-së, në fushën e zbatimit të ligjit.
Postimi i plotë:
“Shqipëria pranohet zyrtarisht në EUROJUST”.
Privilegj dhe kënaqësi të ndaj lajmin e mirë për hyrjen në fuqi të marrëveshjes ndërmjet Shqipërisë dhe Eurojust e nënshkruar më 5 tetor 2018.
Ky rezultat pozitiv vjen pas një bilanci të vlerësuar pune nga ekipi i EUROJUST, ku intesivisht u përpoqëm të plotësojmë të gjitha parakushtet e vendosura.
Falenderoj dhe i shpreh mirënjohjen presidentit të EUROJUST Ladislav Hamran, dhe komisioneres Vera Jurova, të cilët para dhe pas nënshkrimit të marrëveshjes, patën besim për të na ofruar mbështetjen e nevojshme për të realizuar anëtarësimin e Shqipërisë në EUROJUST.
Kjo përgjigje pozitive është një notë e çmueshme që i takon të gjithë mundit tonë, për ta ngritur në një nivel të ri bashkëpunimin për hetimin e krimit transnacional.
Përmes caktimit të një prokurori në zyrën e EUROJUST në Hagë, ne do të rrisim më tej besimin e partnerëve tanë në vullnetin e Shqipërisë për të luftuar krimin e organizuar transnacional, si dhe do të garantojmë shkëmbimin në kohë të shpejtë të informacioneve të nevojshme për luftën kundër krimit të organizuar dhe veçanërisht në sekuestrimin e aseteve që rrjedhin nga veprimtaritë kriminale.
Ndihem e vlerësuar si ministre e Drejtësisë, duke shënuar në kalendarin e punës sonë një tjetër datë suksesi e cila padyshim do të shërbejë si një urë e fortë lidhëse në rrugën që po shtrojmë bashkërisht drejt integrimit të plotë në familjen europiane.
