Instituti i Gjeoshkencës ka bërë publike parashikimet meteo dhe përllogaritje hidrike për dy ditët në vazhdim. Sipas IGJEUM temperaturat do të variojnë nga 2 deri në 15 gradë C, problem priten të jenë reshjet intensive që do të prekin disa nga qarqet e vendit dhe rikthimi i borës në veri të Shqipërisë. Ndërkohë që shkrirja e borës së rënë dhe reshjet intensive pritet të sjellin fryrje të lumenjve dhe daljen e tyre nga shtrati.
PARASHIKIMI METEO
RESHJET
Sot pasdite (e premte, dt.02) dhe nesër (e shtunë, dt.03) në qarqet Shkodër, Kukës dhe Lezhë priten reshje intensive, ndërsa në qarqet e tjera do të jenë të dobëta deri mesatare, por lokalisht të shoqëruara edhe me shtrëngata (siç tregohet në tabelë, respektivisht për secilin qark).
Pritet prania e reshjeve në formë dëbore në 800 m mbi nivelin e detit, kryesisht në Veri.
Shënim: në rastin e reshjeve të dëborës, 1 mm reshje = 1 cm dëborë e re.
TEMPERATURAT
Nesër (e shtunë, dt.03) temperaturat minimale dhe maksimale të ajrit pritet të arrijnë:
në bregdet: 9 / 16 °C
në vendet e ulëta: 7 / 15 °C
në vendet malore: 2 / 10 °C.
ERA
Sot pasdite (e premte, dt.02) dhe nesër (e shtunë, dt.03) era pritet të fryjë e lehtë deri mesatare.
RREZIKU NGA PËRMBYTJET
Nga llogaritjet hidrologjike të IGJEUM-it, rezulton se lumenjtë do të kenë prurje në rritje në të gjithë territorin. Kjo për shkak të kombinimit të shkrirjes së dëborës si pasojë e rritjes së temperaturave dhe reshjeve të pritshme. Rritje të shpejtë të prurjeve do të ketë në Lumenjtë Mat, Ishëm dhe Shkumbin. Baseni Drin-Buna dhe Liqeni i Shkodrës do kenë rritje të prurjeve dhe niveleve. Vlerësimi për rrezikun në këtë basen do të llogaritet në bazë të shkarkimeve nga kaskada e Lumit Drin.
Ky informacion do të përditësohet nga IGJEUM sipas llogaritjeve të ardhshme dhe do të njoftoheni për çdo ndryshim në parashikimin e përmbytjeve.
